Elm və Təhsil naziri Emin Əmrullayev Parisdə, Azərbaycanın Fransadakı Səfirliyinin Mədəniyyət Mərkəzində ALİM Elmi Assosiasiyasının təşkilatçılığı ilə Avropada doktorantura təhsili alan azərbaycanlı tələbələrlə və gənc alimlərlə görüş keçirib.
Nazir Emin Əmrullayev Azərbaycanın ali təhsil sistemində son dövrlərdə baş verən dəyişikliklər, xüsusilə Qarabağ Universitetinin yaradılması və xaricdə təhsil proqramları barədə geniş məlumat verib.
O, təhsil sistemində tətbiq olunan yeniliklər, uzunmüddətli və qısamüddətli strategiyalar, eləcə də həyata keçirilən islahatlar haqqında danışaraq vurğulayıb ki, ali təhsilin keyfiyyətinin artırılması və təhsil müəssisələrinin maddi-texniki bazasının möhkəmləndirilməsi istiqamətində ölkə Prezidentinin imzaladığı sərəncamlar bu sahəyə dövlətin davamlı dəstəyinin göstəricisidir.
Nazir xaricdə doktorantura təhsili almaq istəyən gənclər üçün geniş imkanların mövcud olduğunu diqqətə çatdırıb.
Görüş zamanı doktorantların akademik və elmi fəaliyyətlərinə dair müzakirələr aparılıb.
Sonda Emin Əmrullayev gəncləri təhsillərini başa vurduqdan sonra ölkəyə qayıdaraq elmi fəaliyyətlə məşğul olmağa və Azərbaycan elminin inkişafına töhfə verməyə çağırıb.
Mənbə: AZƏRTAC
Şərhlər