Dekabrın 15-də Azərbaycanın Fransadakı səfirliyinin Mədəniyyət Mərkəzində magistratura və doktorantura təhsillərini başa vuran, hazırda çalışan, eləcə də təhsilini davam etdirən və elmi tədqiqatlarla məşğul olan elmi diasporumuzun nümayəndələrinin Parisdə bir araya gəlməsi sevindirici hadisə oldu. Fransada nəqliyyat sahəsində genişmiqyaslı tətillərə baxmayaraq, uzaq şəhərlərdə yaşayan azərbaycanlı gənclərin bu tədbirə qatılması onların Vətənə olan sevgisini və bağlılığını açıq şəkildə nümayiş etdirdi.
Fransa-Azərbaycan Dialoqu Assosiasiyasının (ADFA) prezidenti və Parisdə Azərbaycan elmi diasporunun təsis yığıncağının təşkilatçısı Günel Səfərova bu barədə AZƏRTAC-a müsahibəsində bildirib.
Elmi diasporun formalaşması və fəaliyyət istiqamətləri ilə bağlı aparılan müzakirələrə toxunan G. Səfərova qeyd edib: “Bu iclasda Azərbaycanın Fransada tanıdılması və ölkəmizin reallıqlarının təbliğində elmi diasporun rolu müzakirə olundu və bu qurumun əsası qoyuldu. Hazırda elmi diasporun strukturuna dair müzakirələr aparırıq və yaxın zamanda idarə heyətinin üzvlərini seçəcəyik. İnanırıq ki, elmi diasporumuz Azərbaycan həqiqətlərinin Fransa ictimaiyyətinə çatdırılmasında mühüm rol oynayacaq.”
Günel Səfərova Azərbaycanın elmi diasporunun yaradılmasına verdikləri dəstəyə görə ölkəmizin Fransadakı səfirliyinə, Diasporla İş üzrə Dövlət Komitəsinə və Azərbaycan Diasporuna Dəstək Fonduna təşəkkürünü bildirib.
Xəbər mənbəyi: AZƏRTAC
Şərhlər